Јужнокорејскиот суд денеска издаде налог за апсење на суспендираниот претседател Џун Сук Јеол, кој беше отповикан во парламентот откако накратко воведе воена состојба на почетокот на месецот.
Така, судот во Сеул одговори позитивно на барањето на Канцеларијата за истраги за корупција за високи функционери (ЦИО).
Налогот за апсење на Џун важи до 6 јануари, а доколку биде уапсен, тој ќе стане првиот актуелен јужнокорејски претседател кој ќе биде затворен.
По можното приведување, ЦИО мора да донесе одлука во рок од 48 часа дали да поднесе налог за апсење на Џун за дополнително испрашување или да го ослободи.
ЦИО побарал налог за апсење откако Џун Сук Јеол игнорирал три покани да се појави на сослушување откако го издаде указот за воена состојба на 3 декември.
Окружниот суд го одобри тоа барање поради сомневање дека Џун нема да одговори на поканата од разумна причина и дека постоi сериозно сомневање дека сторил кривично дело.
Џун е обвинет за водење на бунт, едно од злосторствата за кои јужнокорејските претседатели немаат имунитет.
Адвокатот на Џун, Џун Каб Кеун, рече дека правниот тим на претседателот ќе поднесе тужба до Уставниот суд за да го запре извршувањето на налогот, тврдејќи дека налогот за апсење е незаконски, имајќи предвид дека ЦИО не бил законски овластен да бара таков налог.
Иако не е јасно кога и како ќе се спроведува налогот за апсење, претседателската служба за заштита најави дека ќе постапи согласно законскиот процес.
Како што пренесува „Гардијан“, полицијата била распоредена пред резиденцијата на Џун во центарот на Сеул, откако пред неа се појавиле поддржувачи на суспендираниот претседател и демонстранти кои барале негова смена.
Локалните медиуми објавија слики од тепачката меѓу двата табора во текот на ноќта.
Одлуката за воена состојба вклучуваше забрана за политичка активност и медиумска цензура, што е прва ваква наредба во Јужна Кореја од 1980-тите.
Одлуката за воена состојба ја донесе ненадејно, на 3 декември, а потоа ја повлече неколку часа подоцна, по насилните протести на опозицијата и граѓаните.
Неговиот потег предизвика масовни демонстрации и неколкунеделни политички превирања, ја запре дипломатијата на високо ниво и ги потресе финансиските пазари.
Претседателските овластувања на Џун беа суспендирани откако јужнокорејскиот парламент гласаше за негово отповикување на 14 декември, што мора да биде потврдено од Уставниот суд.