Стејт департментот денеска официјално го извести Конгресот на САД дека ја распушта Агенцијата на САД за меѓународен развој (УСАИД) и дека ќе преземе дел од функциите на УСАИД, јавува Си-Ен-Ен.
Реорганизацијата на УСАИД ќе биде завршена до 1 јули, објави Стејт департментот, со што ќе се запечати судбината на агенцијата која се бореше против сиромаштијата и е позната ширум светот.
Американскиот државен секретар Марко Рубио истакна дека вистинската странска помош може да ги унапреди националните интереси на САД, да ги заштити границите и да ги зајакне партнерствата со клучните сојузници, но УСАИД „за жал одамна отстапи од својата првична мисија“, објави веб-страницата на Стејт департментот.
„Благодарение на претседателот Трамп, таа погрешна и фискално неодговорна ера сега заврши“, нагласи Рубио.
Тој најави дека програмите за помош за странски земји ќе бидат пренасочени за директно да се усогласат со она што е најдобро за САД и нивните граѓани.
„Продолжуваме со основните програми за спасување животи и стратешки инвестиции кои ги зајакнуваат нашите партнери и нашата сопствена земја. Ова е уште едно ветување дадено и реализирано до американскиот народ“, рече Рубио.
Администрацијата на Доналд Трамп ја обвини УСАИД за лошо управување со парите на даночните обврзници и финансирање странски програми кои не се во интерес на САД.
Сегашни и поранешни вработени во УСАИД и експерти за помош тврдат дека агенцијата, иако има недостатоци, ги задоволува виталните хуманитарни потреби и ја поттикнува „американската мека моќ“.