Поранешниот директор на ММФ Доминик Строс-Кан и собарката од хотелот „Софител“ во Њујорк, која го обвини за сексуално злоставување, постигнале согласност за решавање на спорот со финансиски договор, пишува весникот „Њујорк тајмс“.
Строс-Кан и Нафисату Диало мирно се договориле за параметрите на финансискиот договор, кој треба да биде потпишан. Засега не се знае за колкава сума станува збор.
Криминалните обвиненија против Строс-Кан беа повлечени минатата година, но граѓанската процедура не беше прекината. Триесет и три годишната Диало, која е по потекло од Гвинеја, започна граѓански судски процес на 8 август 2011 година со цел да добие финансиска отштета за причинета штета. Таа го обвинува Строс-Кан дека ја принудувал на орален секс. Поранешниот шеф на ММФ тврди дека имал краток сексуален контакт со Гвинејката, но демантира дека ја присилувал.