Се очекува британскиот премиер Кир Стармер во претстојниот телефонски повик да му каже на американскиот претседател Доналд Трамп дека Би-Би-Си мора „да си ја среди куќата“ откако американскиот претседател објави дека ќе го тужи британскиот радиодифузер за до 5 милијарди долари (околу 4,3 милијарди евра), објави денес британскиот Телеграф.
Според весникот, Стармер ќе го искористи разговорот со Трамп овој викенд за да каже дека верува оти Би-Би-Си мора да се придржува до највисоките можни стандарди, вклучително и брзо исправување на грешките.
Висок функционер на Белата куќа изјави за Телеграф дека телефонскиот разговор меѓу двајцата светски лидери ќе биде пријателски.
„Секогаш ќе биде пријателски разговор. Такви се тие“, рече извор од Белата куќа.
Во петокот вечерта, Трамп повтори дека сè уште планира да ја тужи Би-Би-Си, и покрај тоа што радиодифузерот се извини за фалсификување на еден од неговите говори, и додаде дека Стармер е многу засрамен од овој скандал и дека веќе се обидел да го контактира за тоа.