Речиси две недели по потпишувањето на договорот меѓу САД и талибанците, што треба да ја отвори вратата за преговори во Авганистан, има малку знаци за напредок, јави ДПА.
Кабинетот на авганистанскиот Совет за национална безбедност соопшти дека шестчлената владина делегација, испратена во Катар еден ден пред потпишувањето на договорот, се вратила во Кабул.
Не се споменуваше средба на таа делегација со претставници на талибанците, кои имаат канцеларија во Доха. Делегацијата требаше да ги подготви преговорите.
Владата претходно наведе за ДПА дека делегацијата е во мирување и не се состанала со талибанците. Во соопштението се вели дека е планирано испраќање нова делегација.
При пристигнувањето во Кабул, авганистанскиот советник за национална безбедност, Хамдулах Мохиб, рече дека „Авганистан ќе ја задржи својата позиција на активна одбрана ако талибанците не престанат со својата насилна агресија“.
Главниот преговарач на САД, Залмај Халилзад, исто така, рече дека талибанците се пренасилни откако со договорот се согласија да го намалат насилството.