Социјалдемократската партија Напред (Сиумут) на премиерот Ким Киелсе со 27,2 отсто освоени гласови победи на вчерашните парламентарни избори во Гренланд.
Тоа е голем пад на рејтингот на партијата, бидејќи пред четири години освои 34 отсто.
Политичкиот опонент на социјалдемократите, ултралевичарска Инуитско братство (Инуит атакатигит) која се очекуваше да победи, освои 25,5 проценти и го призна поразот.
И двете најголеми партии бележат пад на рејтингот за сметка на центристичката партија Демократите (Демократерне), која е трета по освоените гласови. Демократите се поумерени по прашањето за целосна независност од Данска за разлика од социјалдемократите и левичарите.
Поради изборните резултати најверојатно претстојат преговори за владина коалиција со Инуитското братство или со Демократите.
Гренланд е автономна територија под суверенитет на Данска. Иако географски и етнички арктичката нација е дел од Северна Америка, политилки и историски повеќе е поврзан за Европа.
Гренланд сам управува со своите ресурси, но буџетот и зависи од субвенциите од Данска, која ги контролира и дипломатијата, одбраната и финансиите.