Украина сака подобрени перформанси на беспилотните летала-пресретнувачи за поефикасно спротивставување на руските воздушни напади, изјави врховниот командант на вооружените сили на Украина, Олександр Сирски.
Тој на социјалните мрежи изјави дека состанокот на високи украински воени претставници бил посветен на воена помош и наоѓање начини за распоредување поефикасни одбранбени системи против непријателски беспилотни летала.
„Создаваме слоевит систем за спротивставување на непријателските беспилотни летала „Шахед“ и „Геран“. Нашата заедничка задача е да обучиме повеќе екипажи, повеќе оператори на пресретнувачи и да им обезбедиме поефикасно оружје и радарски системи“, се вели во изјавата на Сирски.
Украинската војска во последните месеци изјавува дека употребата на беспилотни летала-пресретнувачи е најефикасното средство за одбрана од сè поинтензивните напади на руски беспилотни летала, објави Ројтерс.
Украинската војска, исто така, верува дека пресретнувачите се поевтини од традиционалните средства за воздушна одбрана, како што се противвоздушните ракетни системи.