Околу 20 лица се уапсени во пакистанскиот град Мултан за нарачување силување на девојка, како одмазда за силувањето наводно извршено од нејзиниот брат.
Полицијата соопшти дека семејствата на двете девојки се во роднинска врска и дека се договориле каква треба да биде „казната“.
„Селскиот совет нареди силување на 16-годишно девојче како казна затоа што нејзиниот брат силувал 12-годишно девојче“, изјави за АФП полицискиот службеник Алах Бакш.
Како што рече, на селскиот совет претходно овој месец му се обратил маж кој рекол дека неговата 12-годишна сестра била силувана од негов братучед.
Потоа комисијата му наредила на подносителот на барањето да ја силува сестрата на обвинетиот за возврат – што, според полицијата, тој го сторил.
Пакистанскиот весник „Зора“ објави дека девојчето било силувано пред целиот селски совет и нејзините родители. По тој ужас, мајките на двете силувани девојчиња поднеле жалба до локалната полициска станица.
Медицинските прегледи потврдиле силување во двата случаи.
Друг полицаец, Ахсан Јунас, изјави за Би-Би-Си дека првото силувано девојче имало помеѓу 12 и 14 години. Жртвата на силување од одмазда наводно има 16 или 17 години.
Тој рече дека полицијата поднела обвиненија против 25 лица и дека осомничениот обвинет за силување на 12-годишното девојче е сè уште на слобода.
Во Пакистан, жените ретко избираат да пријават силување бидејќи жртвите на сексуален напад сè уште се соочуваат со општествена стигма и осуда.