Саудиска Арабија планира да ја снабдува сириската опозиција со противавионски ракети во борба против воздухопловните сили на сирискиот претседател Башар ал Асад, пишува денеска германскиот неделник „Шпигл“.
Весникот пренесува доверлив извештај добиен минатата недела од германската разузнавачка служба за странство и германската Влада, нагласувајќи дека станува збор за испраќање рачни фрлачи од типот „мистрал“, МАНПАДС.
„Шпигл“ укажува дека рачните фрлачи со ракети „земја-воздух“ можат да погодат нисколетечки авиони, вклучувајќи и хеликоптери. Истите овие ракети им помогнале на муџахедините во Авганистан во борбата против советската војска во 80-тите години.
Западните медиуми објавуваат дека Саудиска Арабија е клучен сојузник на сириските бунтовници и долго време ги поддржува со обезбедување подобро оружје.