Шпанското Министерство за внатрешни работи прогласи вонредна состојба откако денеска снема струја речиси низ целата земја.
Министерството додаде дека вонредната состојба ќе се применува во регионите што ќе го побараат тоа.
Прекините на струјата погодуваат милиони луѓе, како и клучните индустрии, како транспортот и телекомуникациите.
Водечката португалска енергетска компанија РЕН објави дека прекинот на електричната енергија е предизвикан од дефект во шпанската електрична мрежа, поврзан со „редок атмосферски феномен“.
Шпанскиот премиер Педро Санчез изјави дека телекомуникациите се во критичен момент и ги повика граѓаните одговорно да ги користат телефоните.
Премиерот додаде дека нема дефинитивни информации за причината и додаде дека во моментов нема закана за јавната безбедност.
Санчез исто така истакна дека платните системи и дигиталното банкарство работат нормално.
Тој додаде дека Советот за национална безбедност денеска повторно ќе се состане за да оцени дали треба да се воведат дополнителни мерки.