Државната новинска агенција на Северна Кореја, КЦНА денеска ги обвини САД дека се обиделе да го убијат севернокорејскиот водач Ким Џонг-ун.
– Група одвратни терористи се инфилтрираа во нашата земја по наредба на ЦИА и марионетската разузнавачка служба на Јужна Кореја, со цел да извршат државен терористички чин врз нашето врховно раководство, користејќи биолошки и хемиски супстанци. Тие беа фатени и разоткриени. Овој чин го покажа вистинскиот карактер на САД како главен виновник зад тероризмот, објави севернокорејската новинска агенција.
Наводниот обид се случил во мај. Тогаш Северна Кореја соопшти дека имало обид за напад со биолошко оружје, а во денешното соопштение го доведува тој напад во врска со САД и ЦИА.
Односите меѓу САД и Северна Кореја се крајно затегнати, и Ким и американскиот претседател Доналд Трамп редовно си разменуваат закани со меѓусебно уништување.
Во февруари, полубратот на Ким Џонг-ун, Ким Џонг-нам, беше убиен на аеродромот во малезискиот главен град Куала Лумпур од две жени кои го испрскаа со хемиски отров. Ким Џонг-нам беше противник на севернокорејскиот режим и се смета дека бил убиен од страна на Северна Кореја за да се спречи евентуален обид за преземање на власта и раздор во семејството кое владее со комунистичката држава од нејзиното формирање во 1948 година.