Во текот на изминатата ноќ Русија изврши серија напади со беспилотни летала и ракети насочени кон Киев и други украински градови, а украинските власти денеска потврдија дека руските напади предизвикале пожар во индустриски капацитет во областа Тернопил во западна Украина.
До 4:40 часот по средноевропско време, руските сили лансираа околу 136 офанзивни беспилотни летала и истрелаа три проектили, при што украинската противвоздушна одбрана уништи 51 беспилотно летало, соопшти украинското воздухопловство, пренесува Ројтерс.
Дваесет дронови се уште се во украинскиот воздушен простор, а точната локација на 60 дронови не е позната, иако се верува дека биле пресретнати од украинските системи за противвоздушна одбрана.
Поголемиот дел од територијата на Украина беше под тревога за воздушен напад утринава, а регионот на Киев беше под тревога од 17.30 часот во вторник.
Украинското воздухопловство соопшти дека руските сили лансирале беспилотни летала во неколку бранови и од различни правци.