САД се длабоко вознемирени од донесувањето Закон во ирачкиот Парламент според кој се криминализира нормализацијата на односите со Израел, соопшти синоќа американскиот Стејт департмент.
– Покрај тоа што ја загрозува слободата на изразување и промовира атмосфера на антисемитизам, овој Закон е чиста спротивност на прогресот направен од страна на соседите на Ирак, со градење мостови и нормализација на односите со Израел и создавање нови можности за луѓето од целиот регион, изјави портпаролот на Стејт департментот, Нед Прајс.
Тој додаде дека САД ќе продолжат да бидат силен и безрезервен партнер во поддршката на Израел, посебно тогаш кога ги проширува односите со своите соседи за повеќе мир и просперитет за сите.
Ирачкиот Парламент вчера изгласа регулатива според која се криминализира нормализацијата на врските и какви било односи со Израел, вклучувајќи и водење бизнис. Според оваа регулатива, прекршувањето на Законот е казниво со смртна казна или доживотен затвор.
Извор: МИА