САД воведоа дополнителни санкции за руските банки, вклучително и државната Гаспромбанк, третата по големина банка во земјата.
Американскиот министер за финансии рече дека овие нови санкции, чија цел е најголемата преостаната руска банка која сè уште не е под санкции, „дополнително ќе ја ослабат и деградираат руската воена машина“.
Советникот за национална безбедност Џејк Саливан додаде: „САД воведуваат значајни нови санкции против повеќе од 50 финансиски институции за дополнително да ја ослабат способноста на Русија да го користи меѓународниот финансиски систем за финансирање и водење на својата брутална војна против народот на Украина“.
Ова е првпат Гаспромбанка да биде цел на американски санкции од почетокот на руската инвазија на Украина во февруари 2022 година.
Претседателот Зеленски ја поздрави веста, велејќи дека е благодарен за „силните“ санкции кои доаѓаат во „критичен момент“.