САД по деценија и пол повторно испраќаат своја војска и воени ресурси во воздушната база во Саудиска Арабија, а по ескалацијата на тензиите во Персискиот Залив.
Вашингтон, меѓу другото, ќе испрати повеќе од 500 војници, борбени авиони и одбранбени ракетни системи во базата Принц султан, јужно од Ријад.
Оваа база беше седиште на американските воздухопловни сили на Блискиот Исток во 90-те години, но САД ја напуштија по соборувањето на ирачкиот претседател Садам Хусеин во 2003 година.
Пентагон претходно одобри испраќање на американски војници и ресурси во Саудиска Арабија, додавајќи дека тоа се прави со цел да се спречат „непосредните закани“.
Ријад и Вашингтон повеќе недели работеа на договорот и тој не е, како што се наведува, конкретна реакција на иранската заплена на британскиот танкер во Персискиот Залив.
Враќањето на американските воени сили во Саудиска Арабија по 16 години, има воен аспект, но истовремено носи и политички и дипломатски компликации за администрацијата на Доналд Трамп, која критичарите ја обвинуваат за поврзаност со Саудијците по убиството на новинарот Џамал Кашоги.