Американскиот Стејт департмент нуди до 10 милиони долари за информации за активностите на либанскиот Хезболах во Латинска Америка.
„Доколку имате информации за шверц, перење пари или други финансиски механизми на Хезболах во триграничната област, ве молиме контактирајте не. Можеби имате право на награда“, соопшти Стејт департментот.
Триграничната област се однесува на границата меѓу Парагвај, Аргентина и Бразил, каде што, според Стејт департментот, Хезболах генерира приходи преку „перење пари, трговија со дрога, фалсификување американски долари, нелегална трговија со дијаманти и шверц на готовина, јаглен, цигари и нафта“.
Како што објави Ал Џезира, Хезболах заработува средства и преку легитимни деловни активности во Латинска Америка, како што се недвижности, градежната индустрија и увозна или извозна трговија, се вели во соопштението.
Либанската група не ги коментираше овие обвинувања.