САД денеска најавија дека ќе поднесат формален дипломатски протестен демарш за Русија поради, како што велат, небезбедниот и непрофесионален морнарички маневар на еден од руските борбени бродови во Источното Кинеско Море.
Претходно, за инцидентот при кој за малку дојде до судир на воените бродови на САД и Русија, Москва го обвини Вашингтон.
Вршителот на должноста министер за одбрана на САД Патрик Шенехан пред новинарите во Пентагон рече дека руската и американската војска ќе разговараат.
– Секако дека ќе им упатиме демарш, но за мене безбедноста е најважна, истакна тој.
Претходно Руската Пацифичка флота соопшти дека Москва вложила протест со командата на војската на САД откако, како што тврдат, американски крстосувач го попречил минувањето на разорувачот „Адмирал Виноградов“, приоѓајќи му на околу 50 метри.