Израелското Министерство за одбрана денес објави дека пратка од десетина булдожери од Соединетите Американски Држави за израелската војска пристигнала во Израел утрово по месеци одложувања.
Булдожерите „Катерпилар Д9“ и друга опрема за копнените сили на армијата биле истоварени од брод во пристаништето Хаифа, а подоцна натоварени на камиони и однесени во логистички центар на израелските одбранбени сили за оклопување.
Во ноември беше објавено дека администрацијата на тогашниот американски претседател Џо Бајден ја спречува продажбата на булдожерите Д9 бидејќи израелските одбранбени сили ги користеле за уривање куќи во Газа.
Израелските одбранбени сили соопштија дека куќите ги користи Хамас и ја обвинија милитантната група дека користи цивили како човечки штитови.
Американскиот претседател Доналд Трамп, по преземањето на функцијата, повлече неколку мерки на претходната администрација кои имаа за цел ограничување на продажбата на оружје на Израел.
Израелското Министерство за одбрана наведува дека од почетокот на војната во Газа во октомври 2023 година, 870 транспортни авиони и 144 бродови доставиле повеќе од 100.000 тони оружје и воена опрема во Израел, претежно од САД.