По повод падот на азербејџанскиот патнички авион кој беше на пат кон главниот град на Чеченија, денеска се огласија руските власти.
„Ембраер Е190АР, кој се урна во близина на Актау, не можеше да слета во Чеченија поради густата магла и нападите на украинските терористички беспилотни летала“, изјави Дмитриј Јадров, шеф на руската Федерална агенција за воздушен транспорт.
Тој додаде дека азербејџанскиот патнички авион, кој се урна во Казахстан, морал да биде пренасочен од аеродромот во рускиот град Грозни, кој беше привремено затворен поради напади со украински беспилотни летала.
„Друга причина се лошите временски услови“, рече тој.
Патничкиот авион на „Азербејџан ерлајнс“ падна во близина на аеродромот во Казахстан. Авионот „Ембраер 190“ полетал од Баку, главниот град на Азербејџан и се упатил кон Грозни во Чеченија. Некаде над Каспиското Море, пилотот пријавил во контролата на летање дека GPS сигналот е изгубен и дека има проблеми со леталото.
Авионот се урнал во градот Актау во Казахстан, каде пилотот се обидел принудно да слета. Првите информации укажуваа дека летот е пренасочен кон Казахстан поради густата магла на аеродромот во Грозни, но и дека постојат сомнежи дека авионот удрил во јато птици, што наводно довело до трагедијата.