Русија подготвува одговор во борбата против модерниот оклоп што западните сојузници и го доставуваат на Украина. Тој одговор доаѓа во форма на специјално обучени руски воени единици за лов на тенкови, изјави висок претставник на руската одбрана во интервјуто објавено во неделата.
Во интервју за рускиот ТВ канал Ѕвезда, Евгениј Арифулин, кој раководи со воениот центар за обука лоциран недалеку од градот Нижни Новгород во централна Русија, рече дека наредбата за создавање на гореспоменатите единици ја издал рускиот заменик министер за одбрана Јунус- Бек Евкуров.
-Руската војска потоа разви насоки со упатства за постигнување на таа цел, кои се спроведуваат на воениот полигон, додаде тој.
Ова е обемна, систематска работа спроведена на државно ниво, објасни Арифулин.
– Освен „ловци на тенкови“, истиот воен центар обучува и припадници на други единици, како што се артилериски и ракетни единици, рече Арифулин, додавајќи дека Русија може истовремено да обучува 700 војници.
Арифулин нагласи дека руската војска ги проучила сите тенкови што НАТО и западните сојузници ги испраќаат во Украина, вклучувајќи ги американските М1 Абрамс, германските леопарди, британските Челинџерс и француските Леклер.
– Ги знаеме сите нивни силни и слаби страни и тренираме персонал да се бори против нив, рече Арифулин.
Членовите на овие единици за уништување тенкови се обучени од инструктори ветерани кои се бореле во неколку конфликти во текот на изминатите децении, вклучувајќи ја и тековната инвазија на Украина. Според руските медиуми, овие групи се состојат само од мал број војници, кои се претежно вооружени со противтенковски наведувани ракетни фрлачи и најчесто користат извидувачки беспилотни летала.
Претходно оваа година, некои руски компании и официјални лица понудија парични награди за уништување на западната воена опрема во Украина. Александар Осипов, гувернерот на рускиот регион Забајкалски, во јануари потпиша наредба со која им вети на локалните војници 37.000 долари за заземање оперативен тенк Леопард 2 или 12.000 долари за уништување на тој тенк.