Руската војска повторно денеска ја обвини Украина за напад врз резиденцијата на претседателот Владимир Путин со дронови, објавувајќи видео од дронот што наводно бил соборен во тој напад, што Киев го оцени како невистинито, а шефот на европската дипломатија рече дека станува збор за „намерно одвлекување на вниманието“.
Руското Министерство за одбрана објави видео на кое се гледа маскиран војник во близина на остатоците од дрон, тврдејќи дека носел шест килограми експлозив.
Москва го обвини Киев за напад врз резиденцијата на Путин во Валдај, помеѓу Москва и Санкт Петербург, со 91 дрон во понеделник вечерта.
Украина веднаш го негираше ова, истакнувајќи дека нема докази за тоа и дека Москва сака да го оправда блокирањето на преговорите за прекин на конфликтот.
Шефот на европската дипломатија, Каја Калас, во среда ја обвини Русија дека сака да ги саботира мировните напори со тие „неосновани“ обвинувања.
„Тврдењето на Русија дека Украина неодамна нападнала клучни владини објекти во Русија е намерно одвлекување на вниманието. Москва има за цел да го спречи вистинскиот напредок на Украина и нејзините западни партнери кон мир“, рече таа на платформата X.
Никој не треба да ги прифаќа неоснованите тврдења на агресорот, кој неселективно ја таргетира украинската инфраструктура и цивилите од почетокот на војната, нагласи таа во соопштението.
Портпаролот на Кремљ, Дмитриј Песков, предупреди во вторникот дека нападот ќе резултира со „зацврстување на преговарачкиот став на Русија“.
Рускиот генерал задолжен за воздушна одбрана, Александар Романенков, рече дека „терористичкиот напад“ врз резиденцијата на Путин бил „внимателно испланиран“, според руското соопштение објавено во среда.
Руската армија, исто така, објави мапа со траекторијата на дроновите лансирани во тој наводен напад и сведочењето на човек за кој тврди дека е жител на село кое се наоѓа во близина на резиденцијата на Путин.
Американскиот институт за проучување на војната (ISW), кој ја следи војната меѓу Русија и Украина, се сомнева во автентичноста на нападот.
Во вторник, тој објави дека не ги видел аматерските или руските медиумски снимки што обично се објавуваат по украинските напади длабоко на руска територија.
Како одговор на руските бомбардирања, Киев редовно извршува напади со беспилотни летала на руска територија, понекогаш многу далеку од своите граници. Овие напади обично се потврдуваат на местото на настанот од локалните медиуми или се потврдуваат на Телеграм.