Независните руски медиуми „Медиазона“ и „Медуза“ вчера објавија, првпат оваа година, нова проценка за вкупните руски воени загуби во Украина. Според нивниот извештај, 352.000 руски мажи на возраст меѓу 18 и 59 години загинале од почетокот на целосната инвазија во февруари 2022 година.
Во заедничкиот извештај, објавен симболично на Денот на победата во Русија, се наведува дека проценката се базира на податоци од јавно достапниот руски регистар на оставински процедури и на потврдена база на податоци за мртви руски војници што ја водат гореспоменатите медиуми, „Би-Би-Си њуз рашн“ и група волонтери. До денес, потврдени се имињата на 217.808 руски војници убиени во војната.
За првпат, војниците кои биле прогласени за мртви или исчезнати со судска одлука биле вклучени во пресметката во случаите кога телата не биле пронајдени или идентификувани. Медиумските извештаи велат дека околу 90.000 од проценетите смртни случаи спаѓаат во оваа категорија, додека околу 261.000 се класифицирани како жртви на конфликтот, идентификувани преку оставинска и други официјални записи. Според извештајот, бројот на судски барања за прогласување на војници за исчезнати или мртви почнал нагло да расте кон средината на 2024 година.
Објавата се совпадна со годишната парада за Денот на победата во Москва, која традиционално ја одбележува победата на Советскиот Сојуз над нацистичка Германија. Овогодишната парада беше значително помала по обем и без воена опрема, што е невообичаено за годишниот настан.
Новата проценка од независните руски медиуми е пониска од бројките објавени од украинската војска. Според Генералштабот на вооружените сили на Украина, Русија изгубила околу 1.340.270 војници од почетокот на инвазијата, заклучно со 9 мај. Покрај човечките загуби, украинската војска вели дека Русија изгубила 11.920 тенкови, 24.541 оклопни борбени возила, 95.252 возила и резервоари за гориво, 41.712 артилериски системи, 1.780 повеќекратни ракетни лансери, 1.371 системи за воздушна одбрана, 435 авиони, 352 хеликоптери, 281.208 беспилотни летала, 33 бродови и чамци и две подморници.
Независните западни проценки, исто така, покажуваат дека руските загуби значително ги надминуваат украинските загуби. Тинк-тенкот CSIS (Центар за стратешки и меѓународни студии) со седиште во Вашингтон во извештај од јануари оваа година изјави дека руските жртви се приближно два до два и пол пати поголеми од украинските загуби. Според истиот извештај, Украина веројатно претрпела помеѓу 500.000 и 600.000 жртви, вклучувајќи и убиени и ранети, од февруари 2022 до декември 2025 година, од кои се проценува дека помеѓу 100.000 и 140.000 војници загинале во борба. Русија не објавила сеопфатни официјални бројки за своите воени загуби во Украина.