Русија планира да ја изложи опремата на НАТО што ја уништи во Украина пред амбасадите на западните земји кои ја доставија, изјави денеска претседателот на Државната дума, Вјачеслав Володин.
„Особено е интересен предлогот изгорената опрема да се постави до амбасадите на оние земји што ја испраќаат во Украина“, рече Володин, кој издал наредба тоа да се организира, пренесе Ројтерс.
Руските власти постојано ги критикуваа западните земји за снабдување со оружје на Украина, тврдејќи дека ризикуваат да го продолжат конфликтот и да предизвикаат дополнителна ескалација, наведува агенцијата.
Украина бараше оружје за да се одбрани и да ја врати територијата окупирана од руските сили по нападот на Москва во февруари 2022 година, додаде Ројтерс.