Русија ја отфрла можноста за замрзнување на војната во Украина доколку претходно не се отстранат, како што ги нарекува Москва, „основните причини“ за конфликтот. Тоа го изјави заменик-министерот за надворешни работи на Русија, Михаил Галузин.
„Како што повеќепати кажа рускиот претседател Владимир Путин, никакво замрзнување не е можно без отстранување на основните причини за оваа криза“, изјави Галузин за руската државна агенција ТАСС.
Неговата изјава укажува дека Москва не е подготвена да прифати едноставно прекинување на борбите без претходно да се постигне договор за пошироките политички и територијални барања на Русија.
Галузин го обвини украинскиот претседател Володимир Зеленски дека „целосно ја изгубил врската со реалноста“ и дека се обидува да го ескалира конфликтот.
Неговите изјави доаѓаат во период кога Москва ги критикува украинските напади врз цели на руска територија, вклучително и врз енергетска инфраструктура и објекти поврзани со Каспискиот нафтен конзорциум (CPC).
Галузин нападите ги нарече „терористички“ и повика на реакција од меѓународната заедница. Посебно ги посочи САД и европските земји чии енергетски компании се акционери во CPC.
Рускиот дипломат ја критикуваше и американската воена и разузнавачка поддршка за Украина.
„Продолжувањето на испораките на американско оружје за режимот во Киев, обезбедувањето разузнавачки информации и друга помош зборуваат сами за себе“, рече Галузин, оценувајќи дека таквата поддршка е спротивна на напорите за постигнување мир.
Тој се осврна и на неодамнешната изјава на американскиот државен секретар Марко Рубио дека Вашингтон не е „неутрален посредник“, додавајќи дека Москва ова прашање го отвора во контактите со САД.
И покрај одбивањето на замрзнување на конфликтот, Москва тврди дека останува отворена за дипломатско решение.
Галузин изјави дека Русија е подготвена да ги постигне своите цели, земајќи ги предвид договорите од Енкориџ, и дека дипломатско решение е можно доколку постои доволна политичка волја.
Сепак, други изјави на руски функционери укажуваат дека Москва не е подготвена да прифати едноставен прекин на огнот.
Специјалниот претставник на руското Министерство за надворешни работи, Родион Мирошник, неодамна изјави дека Русија треба да се подготви за долготрајна војна, оценувајќи дека завршувањето на борбите во блиска иднина е малку веројатно.
Сличен став во јуни изнесе и рускиот министер за надворешни работи Сергеј Лавров, кој порача дека Москва нема да прифати прекин на борбите долж актуелната линија на фронтот како услов за почеток на преговори. Тој образложи дека Русија веќе еднаш била „измамена“ за време на неуспешните преговори во 2022 година.
Киев во повеќе наврати предложи замрзнување на конфликтот долж актуелните линии на фронтот.
Рускиот претседател Владимир Путин, од друга страна, инсистира дека евентуалното решение би барало Украина да го предаде целиот регион Донецк, вклучително и областите што руските сили не успеале да ги заземат.
Украинскиот претседател Зеленски повеќепати повикуваше на директни разговори со Путин. На 4 јуни, во отворено писмо, тој повика на средба, а подоцна предложи разговор и на маргините на самитот на Г7.
Путин ја отфрли идејата за итна средба со Зеленски. На Меѓународниот економски форум во Санкт Петербург изјави дека таквата средба во овој момент би била бесмислена.