Русија денеска ја повика Украина да не влегува во НАТО, наведувајќи дека неврзаниот статус е во нејзин најдобар интерес.
– Нема сомнение дека неврзаниот статус на Украина е значаен не само заради обезбедување на стабилноста во евроатлантската зона, туку е и основен национален интерес на украинскиот народ, рече шефот на руската дипломатија Сергеј Лавров.
Лавров изјави дека Русија веќе подолго време предлага донесување обврзувачка спогодба што ќе го почитува принципот на неделивост на безбедноста, но Западот не ја прифаќа оваа идеја, пренесоа француските медиуми.
Лавров изјавата ја даде откако портпаролот на Путин, Дмитриј Песков, за британската медиумска куќа Би-Би-Си, изјави дека Русија бара стопроцентни гаранции дека никој нема ни да помисли за влез на Украина во НАТО.
Рускиот министер за надворешни работи додаде дека за нив не се доволни вербалните гаранции на Западот дека НАТО нема да се шири кон исток.