Бразилската претседателка Дилма Русеф денеска изјави дека обидите во Парламентот за нејзино отповикување од функцијата претставуваат „државен удар“, додавајќи дека ќе продолжи да се бори за социјалните програми и покрај актуелната рецесија.
Таа ги омаловажи обидите на опозициските пратеници да ја сменат од функцијата поради нерегуларности околу владиниот буџет.
Русеф својата изјава ја даде во Бразилија, најавувајќи ја третата транша од владината програма за изградба на станбени објекти.
Најголемата бразилска партија, Партијата на бразилското демократско движење (ПМДБ) вчера ја напушти коалициската Влада на претседателката Русеф, намалувајќи ги со тоа нејзините шанси да го надмине се поголемиот притисок во Конгресот, како и барањата за нејзино отповикување.