Земјите кандидати за членство во ЕУ треба да ги усогласат своите надворешни и безбедносни политики со оние на Унијата, изјави летонскиот министер за надворешни работи Едгарс Ринкевич.
Тој во интервју за „Јуроиен Вестрен Балканс“ и за српската новинска агенција Танјуг вели дека Летонија го поддржува процесот на проширување на ЕУ, бидејќи верува во него од лично искуство.
– Сеќавајќи се што се случи кон крајот на 80-те и 90-те години на минатиот век во балканскиот регион, веруваме дека доколку земјите од регионот се подготвени и ако ги исполнат критериумите и ги спроведат реформите и доколку сите во ЕУ се согласиме, тогаш би требало да продолжиме со проширувањето, изјави Ринкевич.
Тој нагласи дека тоа што некои земји, како што е Србија, која прогласи воена неутралност, не сакаат да станат членки на НАТО, не претставува пречка за нивно членство во ЕУ.
– Мислам дека треба да ја почитуваме одлуката на Србија да не бара членство во НАТО. Сметам дека немаме право да и диктираме на која било влада каква би требало да биде нејзината безбедносна политика. За нас членството во НАТО и ЕУ е комплементарно од многу причини, но ја почитуваме одлуката на секоја влада, без разлика дали е на Балканот или во источното соседство на ЕУ, рече Ринкевич.
Според него, Србија е слободна да избере само членство во ЕУ, но не и членство во НАТО.
Сепак, Ринкевич оцени дека би можело да дојде до големи проблеми доколку Европската комисија препорача да заврши процесот на пристапување на Србија кон ЕУ и започне нејзиното членство во блокот, а при тоа Белград продолжи да води политика која не е во согласност со надворешната и безбедносната политика на Унијата.