Директорката на детската агенција на ОН (УНИЦЕФ) го нарече Појасот Газа најопасното место во светот за децата и рече дека привремениот договор за прекин на огнот меѓу Израел и Хамас е „далеку од доволно“.
Извршната директорка на УНИЦЕФ, Кетрин Расел, денеска пред Советот за безбедност на ОН изјави дека за само 46 дена од војната наводно биле убиени повеќе од 5.300 палестински деца.
„Тоа е над 115 мртви деца дневно, секој ден, со недели и недели. Врз основа на овие бројки, децата сочинуваат 40% од смртните случаи во Газа. Ова е без преседан. Со други зборови, денес Појасот Газа е најопасното место во светот за деца“, рече таа.