Премиерот на Шпанија, Маријано Рахој изјави дека Шпанија нема намера да признае независност на Косово, без оглед на договорот за нормализација на односите, кој е постигнат помеѓу Белград и Приштина, во Брисел.
Приштинските медиуми ја пренесоа вчерашната изјава на Рахој, дека ставот на Шпанија за прашањето, за признавање на независност на Косово, нема да се промени.
-Тој став го имаме веќе неколку години и тој нема да се промени. Тоа значи дека ние нема да признаеме независност, бидејќи Шпанија не верува во едноставно признавање -изјави Рахој.
Комесарот за проширување на ЕУ, Штефан Филе по вчерашниот состанок со косовската министерка за европски интеграции, Фљора Читаку нагласи дека одлуката за признавање или непризнавање на независност ќе ја донесе сама Шпанија.
Елена Георгиевска