Британскиот принц Вилијам се сретна во Белата куќа во Вашингтон со американскиот претседател Барак Обама со кого разговараше за многу теми, од илегалната трговија со диви животни до раѓањето на принцот Џорџ.
Принцот Вилијам во неделата со сопругата Кејт, која е во петти месец од бременоста, допатува во тридневна посета на САД.
Ова е нивна прва официјална посета на САД, а во Њујорк се сместени во хотелот „Карлјл“.
Принцот Вилијам сам се сретна во Вашингтон со претседателот Обама, додека војвотката од Кембриџ во Њујорк посети центар за развој на деца.
Портпаролот на Белата куќа соопшти дека тие разговарале за односите меѓу САД и Велика Британија. На средбата присуствувал и потпретседателот на САД Џозеф Бајден.