Поранешната американска амбасадорка во ОН Ники Хејли ја постигна првата победа над поранешниот американски претседател Доналд Трамп на прелиминарните избори за претседател на Републиканската партија во Вашингтон. Хејли победи со 62,86 отсто од гласовите наспроти 33,22 отсто на Трамп, објави доцна синоќа Републиканската партија на ДЦ. Гласаа вкупно 2.035 републиканци.
Ова ја направи Ники Хејли првата жена која победила на републиканските прелиминарни избори во историјата на САД. Хејли, која е поумерена од Трамп, сè уште се смета дека има мали шанси на крајот да го совлада поранешниот претседател за да ја обезбеди номинацијата на републиканците.
Трамп досега победи на сите првични избори, вклучувајќи ја и родната држава на Хејли, Јужна Каролина. Речиси е сигурно дека ќе му се спротивстави на претседателот Џо Бајден на претседателските избори во ноември, а победата на Ники Хејли во Вашингтон ќе остане симболична.
Пред прелиминарните избори во Вашингтон, Трамп веќе имаше 244 делегати наспроти 24-те на Хејли. Нејзината победа во главниот град ќе додаде само 19 делегати на нејзиниот вкупен број. Сепак, Хејли останува во трката барем до натпреварот „Супер вторник“ на 4 март, кога ќе гласаат 15 држави и една територија, Американска Самоа.
Вашингтон е урбана област, со релативно висок процент на жители со високо образование, додека базите на Трамп се рурални области со помалку образовано население. Во главниот град на САД има само 23.000 регистрирани републиканци.
Портпаролката на кампањата на Ники Хејли, Оливија Перез-Кубас, рече дека „не е изненадувачки што републиканците најблиски до дисфункционалноста на Вашингтон го отфрлаат Доналд Трамп и целиот негов хаос“.