Во гаражата на бразилскиот храм Национално светилиште на Госпоѓата од Апаресида, во близина на Сао Паоло, пронајден е експлозив. Предвидено е храмот да биде посетен од папа Франциско, кој од денеска е во седумдневна посета на Бразил.
Експлозивната направа била рачно изработена.
Папата Франциско на аеродромот во Рио де Жанеиро беше пречекан и од претседателката Дилма Русеф. Илјадници бразилски католици, странски верници и љупобитни Бразилци го поздравија папата, кој по улиците на Рио де Жанеиро се возеше во малиот сребрен „Фиат“ со отворен прозорец.
Потоа папата и Русеф имаа средба во палатата на гувернерот на сојузната држава Рио де Жанеиро, а стотици демонстранти протестираа пред палатата поради посетата на Папата.
Бразилската полиција со солзавец и водени топови го растера насобраниот народ. Најмалку еден демонстрант е уапсен, а еден фоторепортер е повреден.
Папата Франциско допатува во Бразил по повод Светскиот ден на младите, тоа е негово прво прекуокеанско патување откако стана поглавар на Католичката црква.