Шефот на израелската армија генерал – потполковникот Бени Ганц вчера му се закани на претседателот на Сирија Башар ал Асад дека ќе одговара за последиците од нападот на израелските погранични сили
Сириската војска вчера соопшти дека уништила едно израелско возило кое ја преминало линијата за прекин на огнот на Голанската висорамнина.
Израелскат војска соопшти дека во нападот на возилото нема повредени.
Генералот Ганц рече дека израелската патрола била мета на неколку напади од сириска страна и го отфрли тврдењето дека возилото било на територија на Сирија.
-Асад наредува експанзија на различни операции против Израел, вклучувајќи ја и Голанската висорамнина – изјави Ганц за медиумите и го предупреди Асад дека ќе одговара за последиците, доколку се влоши состојбата на Голанската висорамнина.
Израел ја окупира Голанската висорамнина, област на југозапад на Сирија во војната од 1967 година, а ја анектираше во декември 1981 година.
Анексијата беше осудена од Советот за безбедност на ОН, додека меѓународната заедница никогаш не ја призна.
По израелско- арапската војна од 1973 година, Сирија го врати градот Кунеитра и околината и тоа го нарече „ ослободена зона“, додека останатиот дел од територијата е се уште под израелска окупација.
Израел стравува дека судирите во Сирија би можеле да се префрлат и преку границата и дека Асад може да ја зголеми напнатоста за да го вовлече Израел и да го сврти вниманието од внатрешните судири против сириските бунтовници.
Но, и дека софистицираното оружје од Русија би можело да дојде во рацете на Хезболах во Либан или бунтовниците меѓу кои се екстремистите поврзани со Ал Каеда.
Елена Георгиевска