Украинскиот парламент денеска усвои резолуција со која се потврдува легитимноста на Володимир Зеленски како претседател, а во исто време ја отфрла можноста за одржување избори до крајот на војната, а со тоа ги отфрли изјавите на американскиот и рускиот претседател Доналд Трамп и Владимир Путин, кои сугерираа дека владеењето на Зеленски е нелегитимно бидејќи не се одржани избори во Украина.
Украинската Рада ја усвои резолуцијата на втор обид, откако вчера немаше доволно гласови за поддршка за нејзино усвојување, јавува денеска ABC News.
Зеленски во неделата рече дека ќе се повлече ако тоа донесе мир во Украина, додавајќи дека тоа ќе го стори дури и ако тоа значи дека неговата земја ќе добие членство во НАТО.
Како што заклучи парламентот, Зеленски ја освои власта на легитимни избори и неговиот мандат не беше доведен во прашање.
Во резолуцијата се наведува и дека изборите не можат да се одржат додека не се укине воената состојба, само откако ќе се постигне праведен и траен мир.
Зеленски стана претседател со убедлива победа во 2019 година, но неговиот мандат истече во мај минатата година, а Украина моментално е во воена состојба во која, според уставот на земјата, не може да се одржат избори.
Повеќето Украинци, како и водечките опозициски партии, се согласуваат дека одржувањето веродостојни избори додека трае војната не е можно затоа што милиони Украинци се во странство како бегалци, а стотици илјади се борат на првите борбени линии, според ABC News.