Египетскиот Касациски суд ја потврди пресудата од 20 години затвор за поранешниот претседател Мохамед Морси и за уште 12 лидери на забранетата група Муслиманско братство.
Пресудата беше изречена за делото немири пред претседателската палата во Каиро кон крајот на 2012 година. Во април минатата година судот ги прогласи за виновни поради провоцирање на насилство, при што загинаа луѓе. Тие беа обвинети за убиство со предумисла на демонстранти, за што е предвидена и смртна казна. Обвинетите тогаш ја обжалија пресудата.
На петти декември 2012 година противниците на Муслиманско братство се собраа пред претседателската палата при што беа нападнати од вооружени приврзаници на исламистите, кои во тоа време беа на власт во Египет. Во судирите, според властите загинаа 10 луѓе, а според демонстрантите – 20, а беа повредени 700 лица.