Поранешниот претседател на Украина, Петро Порошенко доцна синоќа бил спречен да ја напушти земјата и да влезе во Полска, пишува Украинска правда.
Според овој весник, Порошенко се обидел да ја премине границата на преминот Рава-Руска, додека неговата партија „Европска солидарност“ тврди дека властите го ставиле на „црната листа“ и му забраниле да ја напушти Украина.
Потпретседателката на украинскиот парламент Ирина Герашченко, исто така претставник на партијата на Порошенко, изјави дека поранешниот украински претседател има намера да оди на годишната седница на Парламентарното собрание на НАТО, што се одржува на 29 и 30 мај во Литванија, како дел од делегацијата на Врховната Рада.