Претставници на Поместните православни цркви денеска потпишаа декларација со која апелираат да престанат прогоните на христијаните во различни региони од светот.
Декларацијата на рускиот претседател Владимир Путин му ја предаде патријархот на Москва и цела Русија, Кирил.
– Се обраќаме со апел кон сите завојувани страни и кон тие, што можат политички да влијаат врз ситуацијата. Запрете го бранот на насилство и убивањето на мирното население. Прогласете мораториум на воените дејствија, за да може преку преговори да се постигне мировно решение за граѓанските конфликти, се посочува во документот.
Со декларацијата се бара и итно ослободување на двајцата киднапирани митрополити во Сирија. Тие се киднапирани во април од страна на бунтовниците.
– Илјадници христијани секојдневно се мачени, прогонувани од родните места, убивани. Информации за мачења и убиства на христијани доаѓаат од Нигерија, од Пакистан, од Авганистан, од Индија. Вознемиреност предизвикува и ситуацијата во Блискиот Исток, каде низа страни се зафатени од насилство и терор, чии жртви се христијани, се посочува во Декларацијата.
Во документот се наведува и дека во Косово се оштетуваат религиозни објекти и храмови, како и гробишта на христијани.