Полскиот Парламент денеска ги усвои новиот сет закони со кои се проширува опсегот на полициски надзор, но истовремено и се изложува на построга контрола на судот.
Како што пренесе Танјуг, од 234 пратеници дури 213 гласаа за усвојување на законите за полициски надзор, што ги предложи владеачката Партија на правдата и правото, додека тројца беа воздржани.
Меѓутоа, неопходно е Сенатот и претседателот да дадат одобрение за новиот сет закони со кои на полицијата и се даваат поголеми можности за надзор над осомничените, но тој се подложува и на контрола на судот, пренесуваат американските медиуми.
Законот е дел од спорните реформи што владеачката Партија на правото и правдата ги спроведува во државните органи.
Односите меѓу Брисел и Варшава се затегнаа откако во октомври Партијата на правото и правдата, предводена од евроскептикот Јарослав Качински, се врати на власт во Полска, по осумте години минати во опозиција.
Десетици илјади Полјаци, во меѓувреме, демонстрираа по улиците заради инсистирањето на оваа партија да ги спроведе законите со кои и се дава контрола врз Врховниот суд на Полска и врз јавните телевизиски и радио станици.
Европската комисија одлучи да расправа за владеењето на законот во Полска, што може да доведе и до казнени мерки, а станува збор за потег без преседан за една земја членка на ЕУ, наведуваат американските медиуми.