Агенцијата за борба против поморското пиратство од Куала Лумпур денеска потврди дека минатата ноќ пирати нападнале и ограбиле малезиски танкер во делот на Јужното Кинеско Море што се наоѓа меѓу Малезија и островот Борнео.
Ова е деветти напад на пирати во овој дел на Јужното Кинеско Море годинава.
На мошне фреквентниот поморски пат пиратите напаѓаат ноќе, го земаат товарот и ги уништуваат уредите за комуникација. Досега немало човечки жртви при ваквите напади.
Од малезиската Агенција за борба против пиратите упатуваат апели екипажите на бродовите да бидат повнимателни во ризичните води, но бараат и поголема соработка на државите од регионот. Отсуството на меѓународна соработка може да придонесе овој поморски пат, слично на последните три децении од минатиот век, да стане опасно за бродовите.
Различните гледања на државите од југоисточна Азија на правото на сувереност на водите во Јужното Кинеско Море, укажуваат експертите, само им помага на пиратите во нивните криминални операции.