Пилотите на авионот „Боинг 737 МАКС“, што се урна минатиот месец по полетувањето од Адис Абеба, се придржувале на упатството на „Боинг“ за постапување во итни случаи, но сепак не успеале да ја повратат контролата над леталото, објави „Волстрит Џурнал”.
Весникот наведува дека пилотите на „Етиопијан ерлајнс“ се обиделе повторно да ја преземат контролата над леталото со исклучување на автоматскиот систем за летање наречен МКАС, кој го „туркал носот“ на авионот надолу.
Пилотите се обиделе и со рачна команда да го стабилизираат авионот, за на крајот повторно да се вратат на електронската команада.
По повторното вклучување на МКАС, авионот повторно го „туркал носот“ кон тлото.
„Боинг“ не ги коментираше написите на „Волтсрит Џурнал“ во согласност со меѓународните правила да не коментира истрага која се уште не е завршена.
При падот на авионот во Етиопија загинаа сите 157 патници и членови на екипажот.
„Боинг“ упатствата за исклучување на МКАС ги објави по уривањето на сличен авион во Индонезија пред пет месеци.