Портпаролот на Кремљ Димитриј Песков денеска изјави дека рускиот претседател Владимир Путин не ја отфрла можноста за преговори со Украина, имајќи предвид дека во Украина има легитимни власти.
„Путин не одбива ништо. Тој не ја исклучува можноста за преговори. Тој вели дека таму има легитимни тела, во согласност со уставот на земјата“, рече Песков, а пренесува РИА Новости, пренесува Танјуг.
Тој додаде дека украинскиот претседател Володимир Зеленски не е личност со која може да се склучи писмен договор бидејќи, како што наведе, „де јуре тоа би било нелегитимно“.
Зборувајќи за условите за почеток на мировните преговори кои Путин ги претстави во петокот – повлекување на украинските војници од новите региони на Русија и трајно откажување од членството во НАТО, Песков рече дека тоа не е ултиматум, туку мировен предлог.
„Тоа не беше ултиматум, тоа беше мировен предлог, кој беше претставен земајќи ја предвид реалноста на теренот“, рече Песков.
Тој додаде дека договорите на хартија се резултат на многу сложени експертски преговори, рамнотежа на интереси и земајќи ја предвид реалноста на теренот, додавајќи дека така ќе биде и овој пат.