Се уште е можно да се постигне денуклеаризација на Корејскиот Полуостров, благодарение на најновиот договор меѓу Вашингтон и Пекинг, изјави денеска американскиот потпретседател Мајк Пенс.
– Искрено верувам дека постои шанса да постигнеме историска цел по мирен пат, Корејскиот Полуостров да биде ослободен од нуклеарно оружје, изјави Пенс на заедничка прес-конференција со австралискиот премиер Малколм Турнбул и додаде дека САД се охрабрени од чекорите, кои ги презела Кина.
Јужна Кореја соопшти во петокот дека е во состојба на зголемена готовност во пресрет на одбележувањето на уште една годишнина, која Северна Кореја ќе ја одбележи следните денови.
Портпаролот на јужнокорејското Министерство за обединување изјави дека Северна Кореја во вторник, на 25 април, ќе ја одбележи 85-годишнината од основањето на Народната армија, што вклучува и воени вежби, истовремено со одржување на јужнокорејско-американските воени вежби, кои се планирани за крајот на април.