Папата Францис изјави денеска дека е загрижен поради христијаните кои биле присилени да побегнат од Мосул, втор по големина град во Ирак, во кој тие со векови живееле.
Поглаварот на Римокатоличката црква во својот традиционален благослов рече дека ќе се моли за ирачките христијани кои се „прогонети, принудени да ги напуштат домовите без можност било што да понесат со себе“.
Христијаните оваа седмица го напуштија Мосул откако им е даден ултиматум да преминат во ислам, да платат данок или ќе се соочат со смрт. Тоа беше последниот егзодус на христијаните од тој град во кој нивната заедница датира од првите векови на христијанството.
Францис исто така повика на дијлог во решавање на оружените судири ширум светот, посебно на Блискиот Исток и Украина, истакнувајќи дека насилството не може да се совлада со насилство. Насилството се совладува со мир, рече папата.