Полицијата во Флорида синоќа уапси човек кој се појавил во едно кино маскиран како Џокер, главниот негативец во филмовите за Бетмен. Службените лица реагирале веднаш по пријавата од одредени посететели во киното, кои барале нивна помош затоа што имало гледач кој многу чудно изгледа и сомнително се однесува.
Кога пристигнале на местото, полицајците веднаш го забележале 21-годишниот Кристофер Сидес, нашминкан и со фарбана розева коса.
Откако го идентификувале, откриле дека имаат и налог за негово задржување во притвор бидејќи тој имал избегано од рацете на законот поради некои поранешни „ситни“ кривични дела.
Инцидентот предизвика паника кај гледачите во киното, поради масакрот што се случи во јули годинава во Колорадо, кога Џејмс Холмс, маскиран во Џокер изврши напад за време на премиерата на најновиот „Бетмен“ при што загинаа 12 лица, а десетици други беа повредени.
Апсењето на новиот „Џокер“ поминало без проблеми. Тој не давал никаков отпор, ниту пак се заканувал на било кој начин.