Илјадници работници започнаа штрајк во фабриката Foxconn во Кина во која се изработува iPhone 5, запирајќи го производството на најновиот модел на овој популарен смартфон, објави организацијата China Labour Watch.
Штрајкот започна во критично време за американската компанија, само неколку недели откако се распродадоа сите залихи на iPhone 5.
Според China Labout Watch, некаде помеѓу 3 и 4 илјади работници штрајкуваат поради претераните мерки на контролата на изработка и поради тоа што мораат да работат и на празниците кои започнуваат во понеделник и траат цела недела.
Штрајкот не е потврден од друг извор, а Apple одби да ги коментира наводите на медиумите.
Apple и Foxconn веќе се најдоа на удар на критиките поради лошите услови за работа и ниските плати во фабриките во Кина. Како одговор на тоа, тие ги ревидираа условите за работа во фабриките, ги зголемија платите, ја подобрија сигурноста и ја намалија прекувремената работа.