Четири члена на најбогатото британско семејство се осудени на затворски казни поради искористување на индискиот персонал во нивната вила во Женева. Пракаш и Камал Хиндуџа, како и нивниот син Ајај и неговата сопруга Намрата, швајцарскиот суд ги прогласи за виновни за експлоатација и незаконско вработување и осудени се на четири до четири и пол години затвор, пишува Би-Би-Си.
Тие беа ослободени од посериозното обвинение за трговија со луѓе. Адвокатите кои ги застапуваат обвинетите рекоа дека имаат намера да поднесат жалба на пресудата. Говорејќи пред судот, адвокатот на обвинетите, Роберт Асаел, рече: „Шокиран сум. Ќе се бориме до крај“.
Тројцата работници кои биле донесени од нивната родна Индија тврделе дека нивното семејство им плаќало само седум фунти за 18 часа дневно, што е помалку од една десетина од износот што се бара според швајцарскиот закон. Им ги одзеле и пасошите.
Тие, исто така, тврдеа дека семејството – чие богатство се проценува на околу 37 милијарди фунти – ретко им дозволувало да ја напуштат куќата, која се наоѓа во богатиот кварт Келни во Женева.
За време на судењето, обвинителите тврдеа дека семејството потрошило повеќе на своето куче отколку на своите слуги. Одбраната тврдеше дека вработените имале големи бенефиции, не биле држени во изолација и можеле слободно да ја напуштат вилата.
Ова не е првпат Женева, центарот на бројни меѓународни организации, како и домот на светските богати, да биде во центарот на вниманието поради наводното малтретирање на слугите.
Минатата година четворица домашни помошници од Филипините поднесоа тужба против едно од дипломатските претставништва на Женева во Обединетите нации, тврдејќи дека со години не добивале плата. Семејството Хиндуџа е сопственик на „Хиндуја груп“, мултинационална компанија за нафта, гас и банкарство. Семејството го поседува и хотелот Рафлс во Лондон.