Француско-аргентински државјанин, кој во втората половина на јули туристички престојувал во Франција, е заразен со андскиот вид на хантавирус – единствениот познат вид што може да се пренесува од човек на човек.
По потврдувањето на дијагнозата, тој и неговото семејство биле ставени во изолација во Шпанија, соопшти француското Министерство за здравство.
Присуството на андскиот вид хантавирус го потврдил Националниот референтен центар за хантавируси при Институтот „Пастер“.
Министерството наведува дека пациентот имал лесни симптоми, кои во меѓувреме исчезнале, но дека веднаш биле активирани сите неопходни мерки за реконструкција на неговото движење и идентификација на сите лица со кои бил во контакт.
Француските здравствени власти, во соработка со експерти и Агенцијата за јавно здравје, одржале итен состанок за да ги утврдат понатамошните мерки, а воспоставена е и координација на ниво на Европската Унија.
Властите засега не го поврзуваат овој случај со епидемијата на андски хантавирус што претходно беше регистрирана на експедицискиот брод „MV Hondius“, кој во април исплови од Аргентина.
Во таа епидемија починаа три лица, а најмалку 13 беа заразени. Светската здравствена организација на почетокот на јули прогласи крај на епидемијата, откако последниот пациент излезе од карантин.
Иако секоја година во светот се регистрираат десетици илјади случаи на инфекција со хантавирус, болеста е ретка и за неа сè уште не постои ниту вакцина, ниту специфична терапија.
Повеќето инфекции се пренесуваат преку контакт со заразени глодари, но андскиот вид е исклучок бидејќи е единствениот познат сој што може да се пренесува и од човек на човек, што дополнително ја зголемува загриженоста кај здравствените власти.