Високиот комесар на ОН за човекови права, Зеид Рад ал-Хусеин ги повика денеска европските земји да прифатат повеќе бегалци и да се справат со предрасудите и дискриминацијата кон мигрантите кога ќе пристигнат кај нив.
Тој во Советот на ОН за човекови права во Женева истакна дека е „шокиран и засрамен поради постојаната демонизација на мигрантите во многу земји, чии народи уживаат во мир и просперитет“.
Зеид смета дека бројот на мигрантите кои го губат својот живот на медитеранот е „причина за сериозна тревога“ и ги пофали интензивните акции на ЕУ за потрага и спасување.
Високиот комесар побара од европските лидери да се „изборат со огромната нетрпеливост кон мигрантите“, предупредувајќи дека таа би можела да прерасне во насилство.