Околу 13.000 Романци и Бугари се очекува да влезат во Велика Британија по укинувањето на ограничувањата врз нив од почетокот на 2014 годиан, покажува владин извештај, пренесува „Дејли телеграф“.
Извештајот на Министерството на заедници и локалната власт предвидува бројот на имигрантите идната година да изнесува 8.156 Романци и 4.613 Бугари. Тоа е значително помалку од прогнозираните 50.000 имигранти од Бугарија и Романија прогнозирани од групата „Мигрејшн воч“.
Новите податоци беа објавени од министерот за заедници и локална власт Ерик Пиклс, кој изјави дека и покрај тоа не е сигурен во веродостојноста на бројките.
Според него, никој не ја знае вистината, но задача на владата е да не дозволи фактори како здравствени услуги, обезбедување живеалиште и други бенефиции да не привлечат дополнително имигранти од двете источно европски земји, пишува весникот.