Највисокорангираниот руски генерал во пензија го предупреди Владимир Путин да не влегува во војна со Украина, обвинувајќи го рускиот лидер дека создава вештачки конфликт за да го одвлече вниманието од неговите домашни проблеми, јави Ал Џезира.
Генерал-полковник Леонид Ивашов напиша отворено писмо со наслов „Во предвечерието на војната“, во кое ја осудува „криминалната политика на Путин за поттикнување војна“ и покрај фактот што Русија не е соочена со никакви „критични закани“.
Генералот Ивашов, кој се повлече од воената служба и е активен во политиката како претседател на Серускиот офицерски совет, претходно беше во служба на Путин како шеф за воена соработка при Министерството за одбрана.
Во отворено писмо објавено на веб-страницата на Советот, тој истакна дека стравува дека Русија ќе стане „парија на светската заедница“ доколку се изврши инвазија и го повика Путин да поднесе оставка.
Одликуваниот генерал е еден од најпочитуваните и најагресивните генерали во руското Министерство за одбрана и е познат како упорен националист кој сè уште се залага за советскиот систем и е близок до поранешни членови на Комунистичката партија, пишува Ал Џезира. Откако Путин го отпушти во 2001 година, тој стана жесток критичар на рускиот претседател – и често го повикуваше да поднесе оставка бидејќи бил премногу мек и ја штител корумпираната елита на сметка на јавноста, обвинувајќи го за „злосторства против Русија“ .
„Што се однесува до надворешните закани, тие секако се присутни. Но, според нашата експертска проценка, тие во моментов не се клучни, не го загрозуваат директно постоењето на руската државност и нејзините витални интереси“, напиша Ивашов.
Коментирајќи го писмото, експертот за Русија од Стенфорд, Мајкл Мекфол, кој претходно беше американски амбасадор во Русија, рече: Ова е голема работа. Руските генерали обично не се вклучуваат во дебати за јавна политика, особено не оние како Ивашов.
Извор: МИА